錫菲聯冇強攻本錢 熱刺細闖決賽

猪拉多纳

熱刺剛喺英足盃第4圈不敵李斯特城出局，英聯盃成為佢哋今季捧盃最大希望，周四凌晨嘅4強次回合，熱刺作客錫菲聯，由於首回合有一球領先優勢，正路而言熱刺今場應會穩打穩紮睇定嚟踢，至於錫菲聯始終班次有別，想收復失地都有心無力，科娜推介入球細！

（TVB 301周四凌晨3時45分直播）
英足盃出局引以為鑑

熱刺上仗喺英足盃領先住李斯特城大半場，點知晚節不保，完場前連失兩球，其中關鍵第二球仲要係後備門將禾姆蝦碌失手，搞到冇仇報飲恨。熱刺喺英足盃交咗學費，今場關乎可唔可以殺入溫布萊，爭取自07至08球季以嚟再嘗捧盃滋味，領隊普捷天奴當然唔敢再留力，應會派番洛里斯、維頓漢等主力鎮住後防，再搵基斯甸艾歷臣、查迪尼等人喺控制中場，一於穩字行先，首要目標係Keep住首回合1比0嘅優勢入決賽，能否大勝反而係其次。

錫菲聯如想翻盤，今場一定要主攻，但呢隊波始終係英甲仔，攻力唔慌勁得去邊，喺英聯盃能夠打到入4強靠嘅係死守打反擊，叫佢哋守就得，但搶攻就唔係佢哋嗰科。熱刺今季4場英聯盃只失1球，咪諗咁多，一於捧細盤啦！