聯賽盃最叻「蝦細路」熱刺再o趙錫菲聯

猪拉多纳

今晚上演另一場英格蘭聯賽盃4強次回合賽事，錫菲聯首回合輸0:1後重返主場出戰熱刺。雖然話最近盃賽頻頻爆冷，之但係呢支英甲球隊呢排氣勢回落，兼且對手熱刺最叻「蝦細路」，呢鋪就算有地利都信唔過，直取1.61倍客勝。

（TVB301周四凌晨3:45直播）
錫菲聯3場不勝射手鬧入球荒

呢期英格蘭球壇狂吹冷風，難免令波友有戒心，不過錫菲聯連續3場不勝之餘，次席射手占美梅菲亦超過1個月冇波入，今晚都幾難惡得出樣。中場史提芬史葛高賽前話今場波飛幾乎賣斷市咁滯，估計有大約3萬名球迷入場打氣，話到時現場氣氛足夠嚇窒熱刺云云。之不過熱刺長年參戰歐洲賽，更嚴峻嘅環境都見識過，錫菲聯今次想靠嚇贏波，會唔會不切實際咗啲呢？

另邊廂熱刺上場鬥李斯特城臨天光瀨尿輸波出局，一眾球員今仗肯定打醒12分精神應戰，況且佢哋上仗收起一眾主力，足見領隊普捷天奴勁想贏波入決賽。睇番呢班波對上13次喺聯賽盃迎戰低組別球隊，足足贏咗12次，今仗大蝦細睇怕實食冇黐牙！
英聯盃賽制

今輪為4強次回合，採主客兩回合制。兩回合計打和，將於次回合法定時間後加時30分鐘，加時將計作客入球優惠，再和則互射12碼決勝。