御將軍4班難久留

不死鸟

早就認為「御將軍」響4班好快贏得，因為睇過牠在紐試閘，爛地上試700米，全程走外疊，直路相當受騎，上年尾來港後，2月試第一個1000米閘，起步俟一俟失位，沿路跟馬尾，200米望空無推無騎湧上第五，3月頭再試，這次起步暢順，一直吊住「得令先鋒」，當後駒大動作推騎之時，牠才施施然追上前，以首名過終點，如此聽話，感覺還以為是匹舊馬，故4月下旬初出賽我已作介紹，雖然一早咬住第三位，但跑到1200米，新馬始終係新馬，入直路唔夠氣，最終跑第七。相隔一個月再跑，路程不變，當日掛黏至軟地牌，比初出時的好黏地情況更壞，早段守住二、三位，直路只須過一匹不懂出頭的「覓得寶」，當然唔難做到；季尾多跑一仗，全程在五、六位上上落落，未必係正常場地失優勢，應該同加至131磅有關。「御將軍」一如乃父Captain Rio為栗色，但同母馬不少贏至1600甚至2100、2200米，糅合父系速度及母系長力，展望今季踏入4歲好快可再贏，上到3班一樣有可為。