拜仁狼堡駁火做大騷

猪拉多纳

德國波粉絲餓咗個幾月波，今晚德甲終於重開喇！一返嚟即刻有場榜首大戰，由「二哥」禾夫斯堡主場迎戰拜仁慕尼黑。「狼堡」喺歇冬期間簽入中國球員張稀哲，大家梗係想睇到佢落場。況且早前比利時U21國腳馬蘭達艾積因車禍喪生，球隊上下肯定化悲傷為力量，同狀態弗爆嘅拜仁駁火，玩1.52倍入球大最實際。

（有線61、201及中央5台周六凌晨3:30直播）

張稀哲加盟「狼堡」嘅消息，振奮唔少中國球迷，教練赫基讚呢位中國新星傳球技術出色，不過喺強勁班底之下，「小張」要爭取上陣機會有啲難度。
狼堡為悼念戰友搏盡

另外，德甲賽會為悼念小將馬蘭達艾積，今輪9場比賽，賽前都有1分鐘默哀，狼堡仲會有一系列動作配合，佢哋嘅班主已表明會為呢位去世戰友而戰，戰意決心毋容置疑，更何況首循環禾夫斯堡作客拜仁都係僅輸1:2，今仗返主場梗係要同拜仁死過啦！

仲有呀，狼堡嘅奇雲迪布尼係上半季德甲助攻王，有傳曼聯同拜仁都想撬佢，不過佢講明至少會留到季尾，難得今場對住買家之一嘅拜仁，仲唔乘機博表現咩，所以奧歷同比列錫等射手唔憂冇波傳畀佢哋。
洛賓 梅拿狀態弗

至於拜仁，歇冬前喺榜首有11分優勢，教練哥迪奧拿仲講明「狼堡」係佢哋爭標最大敵人，今場當然想直接KO對方除後患。班波喺歇冬期間去咗卡塔爾集訓，最近一場熱身賽以5:1大炒波琴，可見狀態唔錯。以洛賓、湯馬士梅拿等等強勁鋒力攻堅，作客要入波好容易啫！
頂占筍盤：禾夫斯堡（入球大）