車仔絕招 塞冚曼城

猪拉多纳

保5分優細 寸王再泊大巴

英超「雙藍」榜首大戰，車路士主場激鬥曼城，又係「大巴宗師」嘅Show time！「一哥」車仔依家領先「藍月亮」5分，今場只要唔輸，就可以繼續保住呢個優勢，最識計數嘅「寸王」莫連奴梗係深明呢個道理， 今場仲唔使出拿手絕技「泊大巴」嚟頂住搶W心切嘅曼城咩？曼城冇咗中場主力耶耶托尼，簡直同條鹹魚冇分別，估計佢哋點攻都搵唔到車仔着數，今場一於捧細！

（now 621周日凌晨1時30分直播）
冇法比迪哥 更加要守

雖然車路士今季攻擊力係全英超最強，但今場喺助攻王法比加斯受傷缺陣同迪亞高哥斯達停賽下，踢守勢波打反擊對球隊更有利，更何況領先曼城5分嘅車仔「大把喺手」，今場只要唔輸，和波絕對冇壞。莫連奴出晒名係功利主義者，教波講求成績至上，一向打大戰都係穩陣行先，首要目標係力保不敗，今場喺唔需要搶分嘅情況下，相信莫帥又會「泊大巴」，守到曼城一戙都冇，加上車仔啱啱先喺周中同利物浦喺英聯盃4強激戰120分鐘，鬥體力肯定蝕底，而主守對球員嘅體力消耗較少，主場出擊梗係幾大都守住唔輸先。

至於一定要贏嘅曼城，王牌射手阿古路傷愈復出後未復佳態，其他進攻球員如大衞施華、迪斯高、捷西斯拿華斯等狀態亦唔見得特別好，拿斯尼又傷埋。不過最大鑊都係冇咗耶耶托尼，自從呢位中場大腦要代表科特迪瓦出戰非國盃後，「藍月亮」近3場正式賽事，包括英超對愛華頓同阿仙奴，以及英足盃對英冠米杜士堡全部不勝之餘，3仗加埋只入1球，試問咁嘅火力，作客點會有運行？
耶耶未歸 鹹魚難翻生

睇番資料，原來自上年4月以嚟，當耶耶托尼一旦缺陣，曼城喺聯賽居然係一場都未贏過，包括上年12月尾主場對般尼一仗，曼城喺領先兩球嘅情況下竟然被逼和2比2，所以話冇咗耶耶嘅曼城同條鹹魚冇分別其實一啲都唔誇張。今場呢條鹹魚睇嚟都係翻生無望，隨時畀車仔嘅「大巴陣」塞到冚，一於捧細！