阿爾及利亞當起抗迪

猪拉多纳

非國盃8強，兩支捧盃熱門科特迪瓦同阿爾及利亞正面交鋒，科軍演出令人失望，兩位曼城球星韋菲特邦尼、耶耶托尼死晒火，至今仲未開齋，就算今場有前鋒謝雲奴復出，估計幫助亦唔大。非洲新興勢力阿爾及利亞攻擊點多，近年鬥科特迪瓦，都平分秋色。阿爾及利亞受讓平半好着數，力捧下盤。

（周一凌晨3時30分開賽）

科特迪瓦擁有唔少球星，但踢落唔對辦，頭兩場分組賽都贏唔到，直至最後1戰小勝喀麥隆，先至獲出線權，可見呢班大牌球員根本志不在此，讓波只因名牌效應。至於阿爾及利亞近年人才輩出，今屆5個入球由4位球員攻入，整體實力平均。呢支北非球隊過去3屆非國盃，曾兩次同科特迪瓦交手，都保持不敗，包括5年前8強，踢至加時擊敗科軍，有力重溫舊夢。
加納強勢穩(o趙)畿內亞

另一場8強賽事，加納對畿內亞，畿內亞3場分組賽都和波，僅憑抽籤「擊敗」馬里，獲8強席位，有幾多斤両可想而知。加納兩連勝，前鋒阿休已兩球進帳，雙方10次交手，加納取得６勝４和，主W可取。

（周一凌晨零時開賽）