拜仁主場炒史浩克補鑊

猪拉多纳

輸畀狼堡面目無光

今晚德甲加開快車，最值得留意梗係拜仁慕尼黑迎戰史浩克04，拜仁喺前半段聯賽防守固若金湯，17戰僅失4球，點知上場鬥禾夫斯堡輸波被打破聯賽不敗身之餘，仲要1場波勁失4球，認真冇面。拜仁今輪返到「無敵安聯」迎戰鋒線缺態兼唔齊腳嘅史浩克，相信主帥哥迪奧拿會落柯打要贏得好好睇睇，讓2球都唔使怕，一於捧1.85倍「讓球主勝」！

（有線61及201、中央5台周三凌晨3:00直播）

雖然拜仁出晒醜，不過講到質素呢一瓣，佢哋喺德甲拋離其他球隊幾條街，絕對有條件極速反彈。再講吖，拜仁今季聯賽主場全部贏晒，仲要平均每場省入3粒，就算翼鋒列貝利今場要養傷，但羅拔利雲度夫斯基、馬里奧葛斯、湯馬士梅拿、洛賓等鋒將個個踢得，相信教頭哥迪奧拿要喺主場做番齣好戲一啲都唔難。
亨特拉爾坐波監

史浩克歇冬後首戰成功擊敗漢諾威，弊在箭頭亨特拉爾侵犯對手紅牌被逐，今場要坐波監，而且祖普莫亭亦都狀態麻麻，連同最近離隊踢非國盃及德甲在內，呢名喀麥隆射手已經連續5場冇進帳，史浩克兩大射手一個啞火、一個停賽，鋒力根本冇保證。關鍵係作客並非佢哋嘅強項，之前輸過畀賀芬咸、利華古遜等前列分子外，對住「三哥」慕遜加柏更加大敗1:4，今場造訪安聯點捧得落手？