大象兵團4強爆剛

猪拉多纳

星將回魂踢番身價波

非國盃4強大戰爆發，今晚率先上演剛果民主共和國對科特迪瓦，「大象兵團」科特迪瓦射手韋菲特邦尼終於大打身價波，上仗梅開二度，協助球隊以3比1擊敗另一奪標熱門阿爾及利亞。殺到4強階段，相信科軍一班球星爭標鬥心開始嚟料，使出真功夫。剛果民主共和國晉級過程驚濤駭浪，而且受傷兵問題困擾，恐怕會成「大象」腳下亡魂。

（周四凌晨3時開賽）

科特迪瓦今屆表現慢熱，更有傳一班球星好似韋菲特邦尼、耶耶托尼等想喺分組賽出局，趕返英超為曼城對車仔大戰出場，但最後都喺小組出線打入淘汰賽階段，繼續「滯留」赤道畿內亞。可能因為咁，兩位球星乾脆專心為國搏殺，韋菲特邦尼上仗更轟入兩球，耶耶托尼亦有助攻，盡顯功架，可見只要呢班「大象兵團」發揮正常水準，即使世盃16強分子阿爾及利亞亦無力招架。
剛果民主共和國闖關折將

至於剛果民主共和國分組賽3戰都和波，僅憑較多入球出線，上仗8強對剛果，亦一度落後兩球，最終能反勝4比2，似有幸運成分，並付出好大代價。事關後衞薩古亞尼傷出，加上効力西布朗嘅中場隊長穆林保仍然養傷。剛果民主共和國整體實力已經唔及科特迪瓦，依家仲要陣容不整，更加冇得同「大象」鬥，科特迪瓦1.47客勝唔算好分但勝在穩陣，進取啲可以吼埋2.6倍讓球客勝。