拿玻里爆Seed追擊國米

猪拉多纳

意大利盃八強重頭戲，拿玻里主場對國際米蘭，兩位「盃賽專家」賓尼迪斯同文仙尼正面交鋒！賓尼迪斯率領拿玻里奪得上屆意盃冠軍，近期聯賽表現亦愈來愈好。國米主帥文仙尼教練生涯四次捧意盃亦唔輸蝕，問題係球隊近況不濟，新兵磨合需時，寧揀當頭起嘅拿玻里主W。

（now 633及TVB 13周四凌晨3時45分直播）

賓尼迪斯捧過英格蘭足總盃、歐聯、歐霸、意盃，甚至帶領國米奪得世冠盃，「盃賽專家」之名當之無愧，睇來拿玻里今次衞冕成功機會相當高。最重要係呢支意甲勁旅走出上年年尾低沉困境，歇冬後五場聯賽贏四場，信心返晒嚟。連上月加盟嘅前鋒加比亞甸尼上仗亦開齋，配合希古恩、咸錫等高質進攻球員，足以撕破國米防線。
增兵冇起色文仙尼頭痕

國米教練文仙尼曾為費倫天拿、拉素、國米捧過意盃，亦助曼城奪得足總盃，以及為加拉塔沙雷贏土耳其盃，對應付盃賽好有心得。不過國米處於重建時期，上月引入普多斯基、梳頓沙基利等新兵，但成績未有起色，最近仲兩連敗，睇怕文帥仲未諗到改革良方。兩位「盃賽專家」處境有天壤之別，無疑由賓尼迪斯率領嘅拿玻里贏面較大。