C朗停賽仲有占士仔 皇馬喪攻大發神威

猪拉多纳

冇C朗？有「J神」！西甲今晚有場補賽上演，由皇家馬德里喺主場對西維爾，不妨再追1.92倍入球大。雖然皇馬繼續有C朗停賽，但佢哋有占士洛迪古斯大爆發，打破近年皇馬10號冇個掂嘅魔咒，加上往績旺開入球騷，足智彩個入球大細中位數去到3.5球，一於照樣玩「大」佢啦！

（now632台周四凌晨3:45直播）

現時皇馬比多打1場嘅巴塞多1分，形勢上仲未可以鬆懈，日前佢哋喺主場以4:1反勝皇家蘇斯達，賓施馬下半場連入兩球當然抵讚，不過傳媒計過數後發現，除咗C朗、賓施馬同加里夫巴利，今季新加盟嘅占士洛迪古斯，都係皇馬強勢嘅功臣，事關佢喺西甲首季嘅進攻數據，比起被賣走嘅迪馬利亞更堅！
J神入波助攻 多過巴塞中場總和

有傳媒計過，「J神」連盃賽上陣32場，已經有11個入球同10次助攻，多過巴塞隆拿黃金中場沙維、恩尼斯達、拿傑迪錫同布斯基斯嘅總和，打破近年皇馬10號集體迷失魔咒，上仗C朗停賽，反而令「J神」同賓施馬更加合拍Sharp醒，加上「占士仔」仲得到哥倫比亞「金毛獅王」華特拉馬去皇馬訓練場探班兼打氣，隨時又爆Seed，因為「J神」自爆，華特拉馬係佢童年偶像嘛，難得「男神」到訪，小粉絲「J神」，又點可以唔做嘢先？
皇馬3成失波輸角球 益晒西維爾巴卡

對家西維爾陣中有唔少傷兵，包括雷恩斯唔能夠倒戈出戰，而且日前西維爾喺主場以3:2險勝愛斯賓奴，贏得都幾辛苦，睇得出賽程太密對佢哋有影響。只不過，唔計今季嘅西超盃輸0:2，其實西維爾近7次喺聯賽對皇馬有6次開入球大，期間得1次冇波入，況且皇馬今季35場正式賽事所失嘅26球當中，有3成係嚟自角球，西維爾前鋒卡路士巴卡咁頂得，即使西維爾輸鑊甘，都有權破到蛋，今晚呢場西甲補賽，有條件做「大」騷。
盤路解碼

西維爾近4場「讓球主客和」未贏過。
Data King：皇馬專食西維爾

‧皇馬近6次主場對西維爾全勝。

‧皇馬連續5場總入球超過2.5球。

‧皇馬連開4口角球大。

‧西維爾連續9場有波入。