奧堡奇兵反轉「蜜蜂竇」

猪拉多纳

要數邊兩支德甲軍最難估，肯定係多蒙特同奧格斯堡！羞家到跌落榜尾嘅「蜜鋒兵團」，今晚喺主場恭候奇兵奧格斯堡，客軍歇冬後繼續有好表現，新兵賀積查治更加令奧堡戰鬥力「升呢」，呢鋪受讓，要2.75倍「讓客」啦！（有線61及201周四凌晨3:00直播）
多蒙特頹爆主場冇威力

今季被睇淡嘅奧格斯堡繼續扮演奇兵角色，歇完冬返嚟即大勝賀芬咸3:1彈上前列，成班球員個個心都雄晒，話新目標係要爭取來屆歐洲賽入場券喎。冇錯，呢班波係星味不足，但就勝在實而不華，尤其係中前場，土耳其前鋒哈利艾天托普、阿根廷鋒將波巴迪拿同攻擊中場華拿迄今合力貢獻13個「士哥」，加埋由拜仁外借加盟嘅丹麥中場新星賀積查治潛質優厚，奧格斯堡呢隊波絕對唔可以睇小。

對家多蒙特就濕滯咯，上仗賽和利華跌咗落榜尾，鋒將奧巴美揚歸隊後狀態一般，即係話今仗又要靠晒馬高列奧斯1個去入波，樹大招風隨時冇啖好食。況且以「蜜蜂兵團」今季聯賽主場3勝2和3負嘅表現，唔似讓得起氣勢如虹嘅奧格斯堡喎！