紅軍新SAS圍剿保頓

猪拉多纳

史獨復出 史達寧弗爆

「SAS」2.0殺入球壇！抖咗接近半季，利物浦射手史杜列治終於復出，仲一回歸就即刻用士哥同大家打聲招呼添，盡顯上季英超銀靴射手級數。今晚由佢同史達寧組成新「SAS」組合，出戰英格蘭足總盃第4圈重賽，適逢主場出擊嘅保頓冇咗最佳後盾，睇怕難擋紅軍來襲，1.41倍客勝熱都要捧！

（now621、631及668台周四凌晨3:45直播）

蘇亞雷斯同史杜列治喺兩年前組成「SAS」鋒線橫掃英超，令各軍後衞大感頭痛。只可惜呢對組合喺季初因為「哨牙蘇」離隊而拆夥，「史獨」亦自從上年8月鬥熱刺後一直養傷，隨即令紅軍前線死火，只可以靠年僅20歲嘅小將史達寧孭飛掛帥，搞到隊波季初頻頻失分。
謝拉特紅軍700戰

好在「史獨」喺上仗主場鬥韋斯咸正式復出，呢位射手只係後備落場12分鐘就入波，加埋史達寧喺下半場早段打破超過1個月嘅聯賽入球荒，最終利物浦以2:0輕取對手。雖然呢個「SAS」2.0未必有以前咁堅，但勝在潛質無限，而且今仗對手保頓亦唔係咩勁旅，攞嚟做磨刀石就最啱喇。更何況謝拉特今晚好大機會重任正選，「神奇隊長」又點會喺自己第700次為紅軍上陣衰畀人睇吖！
保頓首席門將打柴

相比利物浦有主力回歸，對手保頓就有首席門神阿當保丹缺陣。首回合全靠呢位匈牙利門將左飛右撲力保不失，保頓先得到今晚重賽嘅機會。事實上，保頓冇咗阿當保丹把關，呢班波就錄得1和1負兼勁失6球，證明後備門將朗拿根級數唔夠班。連英冠都搞唔掂，仲點旨意佢頂住新「SAS」先？
Data King：史杜列治踢足總盃醒神

‧史杜列治對上11次足總盃擔正轟入9球。

‧利物浦近18次出戰足總盃只得3場保持清白身。

‧紅軍33次喺足總盃作客較低聯賽組別球隊，合共取得17勝14和2負。
乜都玩錦囊：紅軍防線穩博入球細

利物浦最近回勇，除咗主帥羅渣士搵到條新嘅入波方程式之外，防守變穩亦係佢哋復甦主因。自從防中盧卡斯重任正選後，大大減低球隊後防壓力，加上門將米洛列特最近亦收起一對「牛油手」，令紅軍近6仗有5場零封對手。況且盃賽只求出線不求大勝，相信紅軍唔會刻意大數對手，2.1倍入球細抵玩。