以守行先 柏蒙「半場和」好路

猪拉多纳

南美自由盃聽朝繼續上演外圍賽首回合，來自智利嘅柏利斯天奴相隔36年再度喺自由盃亮相，今場喺聖羅拉球場火併烏拉圭勁旅蒙特維多國民隊，肯定唔敢貿然搶攻，之不過國民隊接近兩個月冇正式比賽，亦相信要一段時間至入局，今場揀1.93倍「半場和」啱數。

（開賽時間：周五早上6:45）
柏利斯天奴闊別36年

季初出閘脫腳嘅柏利斯天奴，近期終於重返正軌，智甲連智盃取得3連勝兼勁轟10球。雖然表現咁醒神，不過佢哋隔咗咁耐先有機會再踢自由盃，球員落到場難免緊張，對住蒙特維多國民隊呢隊自由盃常客，相信主帥古爾迪戰術都會以穩守行先，避免過早失作客入球。
蒙特維多國民隊狀態成疑

蒙特維多國民隊過往曾3次勇奪自由盃，講經驗當然贏晒柏利斯天奴，但佢哋自從成為上季烏甲盟主後，直到出戰今場之前，兩個月內只係踢咗4場熱身賽咁大把，比賽狀態成疑。況且拉菲爾加西亞同柏保路艾華利斯兩名防守主將先後離隊，前波圖後衞富斯尼又養傷，相信教頭艾華路古迪利斯先踢穩陣波，睇定形勢再謀後動。

自由盃外圍賽首回合