ＦＣ悉尼作客特醒頂得住光輝

猪拉多纳

澳職「一哥」珀斯光輝將會喺星期六晚主場迎戰FC悉尼，雖然佢哋排名比對手較高，但由於中場飽受傷停問題困擾，中場羅斯頓格菲斯停賽，加上中場靴斯、尼高斯等三人受傷，一唔小心隨時失手都唔奇。另邊廂FC悉尼就收到好消息，中場安東尼斯同後衞懷奧雙雙復出。要留意佢哋今季作客戰績可人，除咗係澳職唯一一支作客不敗之師（三勝四和）外，仲係作客守力至強隊伍，但偏偏球隊近三次唔可以喺珀斯光輝地頭贏波。想知佢哋今次可唔可以乘勇打破呢個不勝紀錄，到時就記得留意佢哋喇。

（周六晚6時30分開賽）
流浪者頹勢主場捱轟

講衰波，相信今季冇人會比得上西悉尼流浪者，呢支上屆澳職季後賽亞軍得主今季表現慘不忍睹，最羞家係佢哋仲未喺聯賽開齋（四和九負），目前正在榜尾掙扎，名副其實衰到貼地。佢哋仲係澳職火力至弱嗰隊，難怪喺今個星期日喺主場鬥威靈頓鳳凰賽前被人睇低一線。好在流浪者今仗有澳洲射手杜米祖歷、守將史柏拉洛域歸隊，即管睇吓佢哋會否知恥復勇，做番齣好戲。

至於對手威靈頓鳳凰今季最叻入波，佢哋唔單止係聯賽第二猛火球隊，而且鋒線表現勁穩定，令球隊十五次出戰只有一場食白果。咪忘記鳳凰連續五次同流浪者交手都未輸過（三勝兩和），呢鋪空降流浪者地盤真係未出發先興奮。

（周日下午2時開賽）