阿仙奴變臉大爆發

猪拉多纳

北倫敦打吡客戰熱刺

今晚英超早場北倫敦打吡，阿仙奴作客出擊死敵熱刺，勢必踢到飛沙劈石。阿仙奴近兩場聯賽放棄控球轉打穩守突擊，辛迪卡索拉、奧斯爾及基奧特打出「快打旋風」反擊贏盡掌聲，但熱刺絕對唔會坐以待斃，弗爆小將哈利卡尼同賴恩美臣剛續新約令士氣大振，誓要在打吡戰立功攞威，雙方隨時合演入球騷，大盤有買趁早。

（now 621周六晚8時45分直播）

阿仙奴主帥雲格以往風格係力爭控球權，可惜輸反擊都輸死，今季先後不敵車仔、曼聯及修咸頓等前列分子，被好多「廠粉」鬧爆不自量力。可能輸得多，前仗聯賽作客曼城，眾將向雲格「兵諫」改踢穩守突擊，結果一舉殺敗對手，雲格食過翻尋味，上仗對維拉王牌A山雖然受傷缺陣，全場控球率亦只得48%，但當佢哋截到波後就使出「快打旋風」，兩三腳波即劏穿對方防線，最終狂數控球較高嘅維拉5粒，比以往更有效率。
哈利仔續約 熱刺增士氣

賽前阿仙奴防中高基連話北倫敦打吡意義非比尋常，必須要打敗熱刺，中前場嘅奧斯爾、辛迪卡索拉、基奧特縮後打反擊戰仲有威脅，就算王牌阿歷斯山齊士續缺都冇有怕。

另一邊廂，熱刺啱啱同兩名小將哈利卡尼及賴恩美臣續約5年半，將會効力至2020年，其中當旺射手哈利卡尼弗到漏油，連同上仗對西布朗梅開二度，令佢繼80年代麥克科高（Mark Falco）後，成為第二位單季有廿球進帳嘅熱刺青訓產品，腳風順到冇朋友，加埋死球專家基斯甸艾歷臣亦頻有士哥，喺自己地頭出戰死敵必搶攻。

況且現時熱刺只係差第5嘅阿仙奴2分，雙方為搶前四嘅來屆歐聯入場券，戰意唔使懷疑，一隊攻力強，一隊反擊勁，入波唔會少，打吡戰不嬲冇高低之分，與其估邊隊會贏，斯維寧願轉玩大盤。