狼堡上盤有得分

猪拉多纳

隊友亡故悲憤化力量

德甲近期最矚目嘅球隊首推禾夫斯堡，佢哋歇冬後除咗打破拜仁聯賽不敗身，而且仲重金羅致德國國腳舒賀爾尼，即時變成風頭躉！「狼堡」一向靠主場食胡，今季聯賽主場8勝2和成績驕人，今晚迎戰賀芬咸有足夠火力強攻對手，讓半一上盤值博。

（開賽時間：周六晚10:30）

禾夫斯堡一直以嚟都係德甲奇葩，最光輝時刻肯定係09年德甲首度封王，可惜佢哋個車廠主要贊助商經常受外圍經濟影響，搞到近年表現時好時壞。適逢今年係「狼堡」創會70周年，管理層見季初表現不俗，所以喺冬季轉會市場加碼羅致德國世盃冠軍成員舒賀爾尼，務求與拜仁爭一日之長短，上周主場大勝拜仁4:1更令士氣谷到頂點。

其實「狼堡」家陣個勢咁勁，某程度同佢哋個比利時新星馬蘭達艾積意外身亡有關，當時成班波愁雲慘霧，幸好教練赫基經驗老到，勸球員化悲憤為力量，結果「狼堡」喺南非、葡萄牙集訓期間都分外落力，效果昭著，歇冬後兩場表現有目共睹。
拖連奴讓得狠照捧

樂比亦留意到「狼堡」主W喺外國開盤初期已不斷落飛，足智彩低開至1.48倍雖然冇乜肉食，幸好仍有讓半一嘅讓球盤供選擇。值得留意係兩隊交鋒慣大手交易，近14次碰頭有13次入3球或以上，入4球以上亦有10次，即使足智彩將今場大細中位數調整至3.5球，入球大亦可兼顧。

同晚樂比另一場心水係意甲嘅拖連奴，呢班波歇冬後5場聯賽保持不敗，上周更5:1勇挫森多利亞，射手加利亞雷拉腳風甚順，相反對手維羅納近期有啲無心戀戰，睇嚟護級未水浸眼眉，都唔使望佢哋搏殺，拖連奴作客都辣到要讓平半已露端倪，上盤值得一試。
樂比推介：禾夫斯堡（上盤）、拖連奴（上盤）