馬德里內戰大爆發

猪拉多纳

C朗復出 費托回勇

萬眾矚目嘅「馬德里打吡」今晚激烈爆發！上季西甲盟主馬德里體育會主場出擊，迎戰排榜首嘅死敵皇家馬德里，馬體會自從「王子」費蘭度托利斯回家後鋒力提升，另邊廂嘅皇馬亦有餓波嘅C朗復出掛帥，兩隊入球能力都唔講得笑，既然大家都咁攻得，1.88倍「入球大」係必然首選。

（now632台周六晚11:00直播）

費托重返馬體會後首個入球，正正係西盃作客皇馬嗰陣所得，而且仲要入夠2球，協助球隊將皇馬淘汰，心理上肯定有優勢，重拾昔日風采嘅費托賽前表明：「就馬體會球員嚟講，對皇馬嘅比賽就係一場戰爭！」球員戰意當然唔需要懷疑。
馬體會雙「文」有料

除咗「王子」之外，近期最炙手可熱嘅點少得法國國腳基沙文，此子今季加盟後「士哥」不斷，近2場聯賽就有3球進帳，唔好數漏上場聯賽梅開二度嘅文迪蘇傑，雖然費托加盟後上陣時間少咗，不過落到場一樣交足貨。之但係馬體會今季防守唔及上季，防守有一定漏洞，開出大比數戰果絕對唔出奇。
皇馬防線天殘地缺

皇馬喺周中嘅補賽輕取西維爾2:1，但係該仗有士哥嘅占士洛迪古斯重傷，位置將由艾斯高代替，最重要係王牌C朗坐完波監，佢以往响19次打吡省咗15球，今日搶韁入兩粒都唔出奇啦！另外，後防主將馬些路為上仗拎嘅今季第5張黃牌上訴失敗，今場將要停賽，連埋受傷嘅比比同沙治奧拉莫斯尋日確認要抖個半月，皇馬後防天殘地缺，想唔失波都難啦！
盤路解碼

雙方近6次交手馬體會開出5口第一隊入球，比率達83%。