Kane Sterling Sturridge 三英大鬥法

猪拉多纳

熱刺卡尼 VS 紅軍雙史

「三獅射手」大混戰！英格蘭前鋒人才輩出，隊長朗尼點都會佔一席，另外兩至三個位，就由史杜列治、史達寧、韋碧克同熱刺紅人哈利卡尼爭崩頭！卡尼上仗率先帶領熱刺「砌低」阿仙奴嘅韋碧克，今晚呢位型男就食住個勢去晏菲路踢館，向2位師兄史杜列治、史達寧下戰書。為前途為面子，「三英」肯定施展渾身解數KO對方，咁嘅環境，梗係玩1.72倍入球大啦！

（now621台周三凌晨4:00直播）

貴為今季最矚目新星，哈利卡尼喺今季各項賽事一共轟入22球，仲勁過一眾英超巨星包括阿古路、阿歷斯山齊士、迪亞高哥斯達等等，堅犀利！呢位熱刺紅人最近更加係爆晒Seed，踏入2015年，已經射入7個聯賽入球，歐洲主流聯賽當中，只係得美斯嘅入球數字可以同佢睇齊，難怪熱刺班粉絲，都封佢做「新奇連士文」啦！
「新奇哥」士哥 拍得住美斯

不過「哈利仔」又點會甘心淨係喺球隊層面威吖，家陣呢件弗爆土炮，已經講到明目標係成為英格蘭國家隊常規正選，卡尼唔係得個講字，佢上仗倫敦打吡就當住「三獅軍」領隊鶴臣面前發威，一頭一腳幫熱刺反勝阿仙奴2:1，就連「兵工廠」主帥雲格都忍唔住開聲，叫鶴臣盡快徵召呢位21歲前鋒入國家隊！「哈利仔」揮低師兄韋碧克後信心大增，今次踩「紅軍」場肯定搏命，證明自己有力擔起「三獅」大旗！
史杜列治傷愈 狀態逐漸提升

收到「哈利仔」咁搶眼嘅「挑戰書」，利物浦雙星史杜列治同史達寧亦不敢怠慢，尤其係「史獨」傷愈復出後逐漸提升狀態，史達寧表現亦相當Sharp醒，睇埋「紅軍」已經連續14場不敗，中場菲臘比古天奴又可以源源不絕咁提供彈藥，史杜列治同史達寧今晚仲唔搏盡開火數胡咩！

呢場「三英大混戰」唔單止關乎前列位置爭歐聯入場券，而且仲關係到究竟邊個可以擔正做英格蘭國家隊正印箭頭，場波咁有睇頭，梗係買定花生等睇入球騷啦！
盤路解碼

熱刺今季45戰開出31口入球大，大盤率近7成。

Data King：紅軍主場旺和波

‧利物浦近8仗主場出擊和6鋪。

‧熱刺今季英超作客11戰僅輸3場。

‧熱刺前鋒哈利卡尼攻入22球。