20隊變30隊 磨到11月 眼花繚亂

猪拉多纳

阿甲今周重開，球隊一下子由20隊激增至30隊，淨係球隊名都有排記，而且仲會踢到今年11月先收咧，可以話係一個漫長嘅球季；加上排聯賽第18名都有機會出戰南美球會盃呢啲國際賽事，所以一眾傳統球隊會否全力爭奪聯賽冠實屬未知數。至於聽朝上演嘅兩場賽事，沙士菲同衞冕嘅競賽會都有力旗開得勝。

2015年阿甲將由30支球隊角逐，當中包括10支阿乙球隊，30隊波進行單循環比賽，每個地區嘅打吡對手再踢多1場。今季獲得聯賽第3至第6名嘅球隊，有資格出戰南美自由盃資格賽嘅附加賽，排第7至第18名嘅球隊，有資格參加南美球會杯資格賽嘅附加賽，排聯賽第18都有機會參加南美洲嘅大賽，呢個「玩法」喺其他地方未聽過。至於降班球隊就繼續按「系數」玩法決定，即係過去4個賽季成績系數最差嘅2隊降班，而阿乙首名直接升班，第2至第5名打升班附加賽爭奪另一升班席位。

阿甲擴軍到30隊，完全係阿根廷足總主席、國際足協第一副主席格隆多納嘅「傑作」。可惜，格隆多納未見到自己嘅「傑作」誕生，已喺去年7月尾離世，而佢提倡嘅30隊角逐聯賽，更因被大球會群起反抗而差點無法成事。不過，阿根廷政府其後介入，由於政府掌控足球聯賽嘅電視轉播權，並向阿根廷足總支付轉播費用，而阿根廷足總只係負責組織比賽，然後由政府嗰度攞錢，所以30隊計劃最終順利「拍版」。
衞冕競賽會可旗開得勝

阿根廷足總其後決定2015年球季由2月15日起踢至11月8日結束，總計30支球隊參戰。而2016年上半年踢一個由2月至5月嘅短球季，8月開始跨年長賽季，上半年短賽季將產生3個降班名額，只有1支球隊由阿乙升班。2016年8月開始嘅長賽季，到2017年5月束，每年4隊降班2隊升班，咁樣去到2019年，阿甲參賽球隊數量將減番到22或24隊。

至於聽朝舉行嘅兩場阿甲開鑼戰，頭場沙士菲雖有前鋒柏拉圖及後衞施巴斯坦杜明基斯離隊，而且熱身賽表現亦平平，但主場出擊面對實力差一截嘅上季阿乙球隊阿杜斯維，有望殺退對手取得今季阿甲首勝。（周六清晨5時開賽）而衞冕嘅競賽隊除保留上季唔少奪冠功臣外，更引入前鋒奧斯卡羅美路及後衞華盛頓卡馬曹兩位新兵，面對有多名主將離隊陣容大變嘅羅沙里奧中央，有望喺主場球迷前旗開得勝。

（周六早上8時10分開賽）