米堡半和頂住仙

猪拉多纳

寸王教落 遇強要擺「大巴陣」

阿仙奴今晚繼續英足盃衞冕之旅，16強迎戰英冠「阿一」米杜士堡，「兵工廠」近排又受傷兵困擾，「山神」阿歷斯山齊士同艾朗藍斯都加入咗十字軍，真係搞到領隊雲格頭都大埋！米堡領隊卡蘭卡曾經喺皇馬跟過「寸王」莫連奴，深諳「大巴陣」精要，今仗作客越級挑戰當然穩守行先，以米堡嘅人腳同質素，頂住頭45分鐘唔輸應該做得到，呢場玩半場和好路。

（now 621及633周一凌晨零時直播）
兵工廠傷兵滿營

阿仙奴陣中已經有迪保治、阿迪達同阿歷士張伯倫養緊傷，啱啱喺周中英超快車贏李斯特城一仗再添兩大傷兵，阿歷斯山齊士雖然傷勢冇乜大礙，但相信為穩陣起見唔會派佢出戰，而艾朗藍斯就大鑊啲，今場肯定缺陣。雖然雲格喺賽前講過會認真對待英足盃，希望冧到莊，但亦作出補充，指英超先係球隊首要目標，要確保下季都殺得入歐聯。明嘅，一個係吸引力大減嘅國內盃賽，另一個就金礦，識揀一定係揀後者，睇嚟「兵工廠」今場對米堡最多只會使出8成功力。

講到米堡，呢支近日升上榜首位置嘅英冠球隊，全靠領隊卡蘭卡先有今日。41歲嘅卡蘭卡曾經喺西甲班霸皇家馬德里做過莫連奴助教，盡得「寸王」真傳，大巴陣啦防守大過天，唔理踢法醜陋，但就成功令米堡成為英冠失波最少球隊，上一圈英足盃對住曼城都係以守致勝，今場對住阿仙奴當然係照辦煮碗喇！
靠車仔借將食胡

另外，卡蘭卡同「寸王」friend過打band，除咗學曉攞「大巴陣」外，陣中首席射手班福特、守將奧美魯奧同卡拿斯呢3大主力都係車仔借將，為咗日後有機會重返史丹福橋，有機會對阿仙奴仲唔爭取表現咩？莫連奴出晒名係阿仙奴領隊雲格嘅剋星，雲格對住「寸王」一向冇乜符弗，今場對住「寸王徒弟」卡蘭卡擺出嘅米堡「大巴陣」，睇嚟定要經過一番苦戰，要贏都要等下半場。