紅軍開攻大吉

猪拉多纳

羊年首擊唔錫身

成日話歐霸盃唔吸引，但大年初二深夜嘅32強首回合其實有唔少好嘢，重頭戲就梗係利物浦對住土超榜首嘅比錫達斯，兩軍雖然未至於係十冤九仇，不過都有啲牙齒印嘅，「你炒過我8蛋，我就跣你一鑊」，好睇程度拍得住歐聯。紅軍「黑雙煞」史杜列治同巴洛迪利全面復甦，喺主場對住有正選門將缺陣嘅比錫達斯，仲唔喪攻爭取首回合領先咩？捧大最啱數！

（有線61及201台周五凌晨4時05分直播）
同比錫達斯有積怨

利物浦前幾年仲係賓尼迪斯領軍嗰陣，喺歐聯戰績標青，創下多場經典戰役，包括07-08球季，喺歐聯分組賽於主場狂風掃落葉數比錫達斯8蛋，癲到仲畀人懷疑係咪打假波。比錫達斯創出歐戰最大敗仗，不過當家前鋒丹巴巴亞多年後都間接幫比軍報仇成功，呢位塞內加爾射手上季踢車路士，把握紅軍隊長謝拉特嘅「世紀一跣」入波，搞到利記跌咗個英超冠軍。

利記今仗有「謝四」同史達寧因傷倦勤，但好彩史杜列治已經回歸，而「巴神」有翻生迹象，紅軍攻力疲弱嘅問題得到解決，遇着有首席門將杜加辛堅因膝傷缺陣嘅比錫達斯，入波有保證，今場一於捧大。

由於今屆嘅歐霸盃盟主可以直接攞到下屆歐聯入場券，令其重要性大增。喺英超同利物浦一樣喺爭4前唔多穩陣嘅熱刺將會喺主場迎戰意甲費倫天拿，兩隊勢均力敵，但費倫天拿挾住近8場不敗嘅走勢，今場受讓值捧。

（有線64及203台周五凌晨4時05分直播）
羅馬主場孭唔起「飛」

至於早場心水就有羅馬主場鬥荷甲飛燕諾，「雌狼」上場意甲對住榜尾嘅帕爾馬，為搵中國人錢，着上心口印上「拜個早年」嘅波衫，結果同對手悶和。但其實無論有冇着住呢件娘爆波衫，羅馬主場都係唔掂，佢哋近8次主場都未贏過，今場梗係揀受讓嘅飛燕諾啦！

（有線61及201台周五凌晨2時直播）
‧推介表‧

（四）5 飛燕諾 讓球勝

（四）13 利物浦 大

（四）15 費倫天拿 讓球勝