修咸頓撞散紅軍

猪拉多纳

主隊一團和氣 客軍隨時莫氣

英超初四夜爆發大戰，由修咸頓主場硬撼利物浦，「紅軍」呢排勁頻撲，賽程密到爆，3日前雖然喺歐霸盃32強首回合小勝比錫達斯，但又爆出內訌，巴洛迪利爭贏佐敦軒達臣射入12碼，引起隊友不滿。相反季初被拆骨嘅修咸頓就團結到爆，防守又穩，「聖人」今場坐和望贏，平手盤咪錯過呀！

（now 621周一凌晨零時15分直播）
巴神唔生性損士氣

雖則話「巴神」長期都冇正選踢，爭射12碼一事唔會影響球隊今場作戰心態，不過利物浦呢排戰績唔錯，球員士氣高昂，但「巴神」上場唔尊重隊長軒達臣、唔尊重領隊嘅指令，搶咗個12碼嚟射，惹起「神軒」同史杜列治不滿，連因傷缺陣嘅謝拉特都鬧爆佢，球隊嘅團結氣氛唔多唔少都會受到破壞，連「神軒」呢位隊長接班人嘅威信亦受損。

唔單止陣中不和升溫，利物浦領隊羅渣士仲要諗計解決球員體力問題，「紅軍」自上月21日喺英聯盃首回合鬥車路士開始，一個月嚟踢咗9場波，即係差不多每3日踢一場，今場又要作客，真係鐵人都頂唔順。「紅軍」睇落今季板櫈深度加強咗，但其實一班主力好似菲臘比古天奴、佐敦軒達臣、安利簡恩同史卡迪爾等場場都踢足冇乜點抖過，今場對住踢法硬淨嘅修咸頓，隨時因被對手陰乾體力而崩潰。
半場和大旺可兼投

「聖人」修咸頓季初慘被肢解，三線都有主力被撬走，畀外界睇死佢哋係今季降班膽，結果球隊反而更團結，個個都肯跑兩步，將緊迫踢法發揮到極致，呢隊波以穩健防守作為基礎，再配以高效反擊，令唔少球隊吃盡苦頭，當中包括車路士、阿仙奴及曼聯等前列球隊。今場對住肢解「主兇」之一、搶去列基林拔、拉爾拉拿同洛夫雲3名主力嘅紅軍，「聖人」更要騷畀呢班「叛徒」睇，球隊絕對係「活得比你好」，修咸頓平手盤信得過！

另外，大家仲可以順便捧埋半場和，因為兩軍近期皆旺開半場和，修咸頓連續3場皆開出半場和，而冇氣冇力嘅「紅軍」更係8場入面有7場係開半和，2倍嘅半場和都幾和味！