祖記多蒙特和氣生財

猪拉多纳

意甲班霸 Vs 歐聯專家

今晚又有歐聯16強首回合睇，祖雲達斯喺主場迎戰多蒙特，3.05倍和好路。祖記雖然係意甲一哥，近年更加喺聯賽打橫行，不過「斑馬軍團」近年去到歐洲賽場戰績並唔理想，反映意甲水準每況愈下，今晚佢哋喺主場鬥全面回勇嘅多蒙特，要贏唔係咁易，新正頭，梗係要「和氣生財」啦！

（有線62及202周三凌晨3:45直播）
列奧斯續約多蒙特即反彈

祖記上周末喺意甲主場憑洛蘭迪同派路入波，反勝下游分子阿特蘭大2:1，唔經唔覺保持咗個超過3個月嘅不敗走勢！係，表面睇祖記好似好弗咁，人腳亦相當齊整，中場有愈老愈可愛嘅派路、上位新星保羅普巴，鋒線更加有上場復出嘅「野獸」泰維斯同洛蘭迪，但唔好忘記，祖記上屆喺歐聯分組賽出局，今屆喺分組賽亦踢到最後一輪先確定次名出線，證明呢支所謂意甲班霸，一出去到歐洲賽場就見底，今晚佢哋個主W熱到得1.98倍，根本就唔合理。

另邊廂嘅多蒙特，今季喺德甲表現令人大失所望，仲一度跌過落降班區包晒尾，搞到球迷鬼咁擔心。好彩，隨住王牌馬高列奧斯傷愈復出後即刻續約，呢班波即時嚟料，近3戰全勝，淨係睇鋒線拍檔馬高列奧斯同奧巴美揚分別連續3場入波，就知依家嘅多蒙特，同季初嗰陣真係差好遠。

最重要一點，大家要知道多蒙特近年係歐聯常客，前屆仲打入埋決賽，就算今季多蒙特喺聯賽走樣，去到歐聯分組賽亦一早確定首名出線席位，可見主帥高普堅係歐戰專家，今晚「蜜蜂兵團」去到意大利都靈，相信會踢番一貫嘅穩守戰術，博次回合返主場先再解決祖記，既然斷斤秤兩軍冇乜高低，一於博夠晒分頭嘅「和波」啦！