阿仙奴「讓主」趁早吸納

猪拉多纳

難得抽好籤主場必搏殺

今晚繼續有歐聯16強首回合大戰上演，阿仙奴會喺主場迎戰法甲豪門摩納哥。「兵工廠」近兩屆都喺16強講Bye Bye，冇計啦，連續兩年都係對住德國班霸拜仁，唔夠砌好正常。不過「廠迷」又唔使擔心喎，事關「兵工廠」今屆抽到好籤，對手只係實力一般嘅摩納哥，而且一班前線「槍手」近期又弗到漏，今場2.6倍「讓主」真係唔好錯過。

（有線61、64、201、203及中央5台周四凌晨3:45直播）

阿仙奴近9場取得8勝1負，狀態可以話弗到震，主要同隊內一眾傷兵陸續傷愈復出有關，好似養傷多時嘅禾確特，復出即有「士哥」。講到另一位復出後有好表現嘅「槍手」，就係近兩場斬獲3球嘅法國射手基奧特，拍住韋碧克同「A山」攻堅，加埋奧斯爾同辛迪卡索拉兩位極富創造力嘅球員喺中場派牌，今仗要喺酋長球場撕破摩納哥防線，相信難度唔高。
摩納哥跌Watt 貝碧托夫高峰已過

「兵工廠」前線兵源充足火力自然有保證，攻擊得心應手之餘，防線亦都交到貨，自從雲格用奧斯賓拿代替施捷斯尼把守最後一關，成條防線確實穩健咗唔少，相信今晚如無意外都係奧斯賓拿繼續擔正，摩納哥想攻破「兵工廠」大門唔係易事。

客軍摩納哥喺1月係威係勢連續6場不敗，不過踏入2月後成班波明顯跌Watt，近5場只錄得2勝2和1負。雖然佢哋有張峰幾欣賞嘅「瀟灑哥」貝碧托夫孭飛，可惜佢今季喺法甲得6個「士哥」，不得不承認高峰已過。除咗「瀟灑哥」之外，中場摩天奴嘅名氣都唔細，弊在呢位葡萄牙國腳由出道到依家都畀人名大於實嘅感覺。今晚阿仙奴無論牌面定狀態都贏晒，搭埋地利之助，「讓主」絕對追得過！
盤路解碼

阿仙奴連續9仗主場贏波。
Data King：摩納哥作客旺入球細

‧阿仙奴以往主場對法國球隊有5勝3和2負。

‧阿仙奴連續12場主場半場不失。

‧摩納哥連續11場作客總入球少過2.5球。
歐聯賽制

採主客兩回合制，今輪為16強首回合。兩回合計打和，計算作客入球優惠，未分勝負將於次回合法定時間後加時30分鐘，加時階段仍計作客入球優惠，再和則互射12碼決勝。
好波有得睇（直播以電視台公布為準）

亞冠盃‧鹿島鹿角 Vs 西悉尼流浪者：周三晚6:00‧now670台

亞冠盃‧FC廣州 Vs FC首爾：周三晚8:00‧now671台

歐聯‧阿仙奴 Vs 摩納哥：周四凌晨3:45‧有線61、64、201、203及中央5台

歐聯‧利華古遜 Vs 馬德里體育會：周四凌晨3:45‧有線62及202