活力紅軍土國劈錫

猪拉多纳

歐聯誘惑 領先照砌

今屆歐霸盃冠軍可以參加下屆歐聯，大大提升各勁旅爭標意欲，最明顯例子肯定係利物浦。今季英超前四競爭激烈，紅軍想再戰歐聯，踢好歐霸係另一出路。今晚歐霸盃32強次回合，利物浦手握領先1比0優勢，作客土耳其球隊比錫達斯，可以專心踢穩守突擊，紅軍幾位生牯仔有活力速度快，大把發揮空間，小讓平半細鬼睇好利物浦上盤。

（有線61及201台周五凌晨2時直播）

唔少紅軍球迷唔捨得隊長謝拉特今季結束後離隊，但現實係殘酷，現代足球始終講究體力、速度，謝老四年事已高，水準明顯走下坡，若然繼續佔據正選位置反成負累。謝拉特近期養傷，球隊由史達寧、史杜列治及菲臘比古天奴擔大旗下，踢得更加順，甚至連小將佐敦伊比都有驚喜演出。呢班後生仔勝在跑得快，令對方守將防不勝防。利物浦既然首回合贏1比0，大可踢番擅長嘅快速反擊，更適合現時人腳速度快嘅特質。
比錫達斯得丹巴巴亞孭飛

土耳其聯賽水平麻麻，比錫達斯即使擁有前車仔射手丹巴巴亞，但孤掌難鳴，而且呢位塞內加爾國腳現時水準同高峰時期有距離，不宜高估。除此之外，比錫達斯兩位後衞阿辛古林及雷蒙莫達今場停賽，成為一大隱憂，如果心急搶攻收復失地，隨時衰多幾錢重。