費倫 熱刺「細」均力敵

猪拉多纳

今晚舉行嘅歐霸盃32強次回合比賽，其中一場矚目戲碼嚟自意甲嘅費倫天拿主場迎戰英超球隊熱刺。雙方喺首回合打和1:1，「紫百合」今場唔使心急搶攻，相反對手熱刺隨時分心英聯盃決賽留力。橫睇掂睇場波都唔似駁火格，吼1.82倍入球細。

（有線64及203周五凌晨2:00直播）
講明留力英聯盃決賽

「紫百合」依家手握1粒作客入球喺手，今晚重返主場出擊大可睇定慢慢踢，何況佢哋歷來4次歐戰主場都未輸過畀英格蘭球會，兼且全部零封對手，熱刺想攞「士哥」睇怕真係唔容易。雖然費倫門將達泰魯辛奴休戰改由尼圖把關，但後者盛傳獲得祖雲達斯垂青，之前因為衰唔續約先被雪藏，難得有機會擔正「騷哥利」，相信尼圖今晚梗會力保大門不失。

另邊廂嘅熱刺，由於嚟緊周日要同車路士爭奪英聯盃冠軍，領隊普捷天奴都話會諗辦法平衡兩場比賽嘅人腳。咁講法睇怕主力哈利卡尼、基斯甸艾歷臣就算有得踢，落場時間都唔慌多，艾迪巴約缺陣下前線得番蘇爾達杜一個，咁樣仲點做大騷先？
歐霸盃賽制

採主客兩回合制，今輪為32強次回合。兩回合計打和，計算作客入球優惠，未分勝負將於次回合法定時間後加時30分鐘，加時階段仍計作客入球優惠，再和即互射12碼決勝。
首回合：費客和1:1