阿聯追榜首開火攻城

猪拉多纳

甘巴爾打造西班牙化勁旅

今日澳職獨腳戲，墨爾本城主場對阿德萊德聯，主隊雖然有英超勁旅曼城做後盾，但雷聲大、雨點小，並未有優質球員加盟。反觀阿德萊德聯由前傑志主帥甘巴爾執教下，「西班牙化」策略成功，今季更進身爭標行列，足以擊敗「偽豪門」墨爾本城，阿德萊德聯小讓平半，Mic少推介上盤。

（有線64及203台周五下午4時40分直播）

阿德萊德聯上季畀球迷感覺係有前冇後，前鋒入波都唔夠後面輸，導致成績一直未如理想；有見及此，教頭甘巴爾今季決心改善防線，羅致兩位本土當打守將戴恩麥高雲及奇治葛雲，效果立竿見影，成為澳職眾多球隊之中現時失波最少球隊。

最重要係阿德萊德聯攻力依然不減，西班牙鋒將柏路山齊士、沙治奧施里奧合作純熟，已合共為球隊攻入十球，加上阿根廷中場卡路斯卡亦頻頻有士哥，呢股「西班牙語系」威力相當強大。阿德萊德聯自06年奪得常規賽冠軍後，好耐都未威過，難得今季重現爭標霸氣，而且現時只係落後榜首珀斯光輝兩分，餘下比賽肯定全力催谷，力爭一哥位置。
墨爾本城態沉陪跑

季前雄心壯志嘅墨爾本城，季初搵到前西班牙國腳球星韋拿助陣，原本以為創出一番佳績，可惜球隊至今表現都未見突出；更令人擔心係呢位西班牙射手離隊後，攻力進一步下降，近五場聯賽竟然有四場入唔到波。

三十五歲嘅前車路士翼鋒杜夫年事已高，表現有心無力實際貢獻唔多，至今只有一球進帳，更因傷今仗缺陣。Mic少認為墨爾本城今季純屬造陪跑分子，志在吸收經驗，今仗阻唔到阿德萊德聯成大事。