曼聯擺大個頭 強勢捉貓

猪拉多纳

曼聯今季水準飄忽，非常難捉摸，唯一有「連貫性」嘅係防線曳，往往靠門將迪基亞力挽狂瀾，但呢位「神龍」被指同領隊尹戈爾關係日趨緊張，隨時影響集中力，難保清白之身。慶幸尹帥終於畀番朗尼踢前鋒，其他中場球員後上攻門亦相當有威脅，主場攻陷「黑貓」新特蘭大門仍然樂觀，首選入球大。

（now621周六晚11時直播）
朗尼踢番前鋒火力增

曼聯今季條豆腐防線認真唔掂，若非有迪基亞，佢哋依家肯定排唔到前4。不過有傳呢位西班牙鋼門不滿尹戈爾唔重視佢嘅貢獻，令佢非常唔順氣。據悉兩人已經個幾月冇傾過偈，加上經常傳出皇馬想斟迪基亞，令人擔心曼聯支「定海神針」會開始動搖。

紅魔後防隱憂重重，但今仗始終係主場出擊，加上來季歐聯入場券對佢哋實在太重要，所以唔好低估佢哋嘅爭勝決心。尹戈爾之前安排朗尼踢中場效果一般，近期終於將佢推番上前掛帥，令佢重拾射手觸覺。雖然話尹佩斯受傷要抖1個月，但咁反而係好事，事關尹戈爾經常排出3前鋒，令前線「塞車」人腳重疊，阻礙進攻，依家用番朗尼主力數胡，排出4人中場，令攻守更平衡，而安達靴里拉、費蘭尼等人後上攻門亦好煞食，以曼聯近9次主場8勝嘅走勢，入波唔成問題。
新特蘭靠迪科爾食胡

新特蘭方面依家排緊16，仲搶緊分護級，上月作客曼城亦踢得進取，僅以2比3落敗，遇上霸氣不再嘅曼聯更加會主動搶攻。「黑貓」冬季簽咗寶刀未老嘅迪科爾，呢位射手近4場聯賽攻入兩球。以佢嘅大賽經驗應該恰到曼聯一班平庸守將，基於雙方都有入波本錢，呢場大盤值捧。