巴塞細捱「神經刀」

猪拉多纳

(六)19 CF格蘭納達 VS 巴塞隆拿

巴塞隆拿今晚西甲作客「神經刀」CF格蘭納達，絕對唔易啃，「地上最強」以往去到對方地頭都陷於苦戰，上季更大熱倒灶輸0比1。巴塞仲要剛於周中歐聯惡鬥完曼城，體力消耗極大，未必回得切氣。CF格蘭納達勢必死守博1分，即使輸亦係小敗居多，巴塞客W冇肉食，讓球主客和「-2」客勝唔穩陣，入球大細中位數3.5球，揀入球細。

（now 632周六晚11時直播）

表面上兩隊實力懸殊，但睇往績巴塞近3次作客CF格蘭納達，並佔唔到太大優勢，兩次贏波分別僅勝1比0同2比1，上季仲輸埋。可見CF格蘭納達主場鬥巴塞，的確有計。巴塞另一個問題係近期賽程頻密，美斯上仗歐聯射失12碼，腳風唔順，尼馬表現亦平平，似有疲態。巴塞下周中仲要出戰西班牙盃4強次回合作客維拉利爾，今場聯賽未必搏盡，就算可以領先，都可能慢慢搓到尾。
CF格蘭納達主場夠韌力

CF格蘭納達明知唔夠班同巴塞鬥攻，相信只會以1分為目標，一於屯重兵防守，佢哋近6場聯賽主場不敗兼全部開細，當中5次和波，包括同前列球隊華倫西亞打和1比1，足見韌力十足，巴塞炒唔起佢哋。