韋斯咸主場有水準

猪拉多纳

(六)7 韋斯咸 VS 水晶宮

近況唔錯嘅韋斯咸會喺今晚英超早場主場對水晶宮，「錘仔幫」近期戰績麻麻，已經連續5場未贏過，但細心留意嘅話會發現當中有4場係作客賽事，而主場就係畀曼聯逼和，表現其實唔差。韋斯咸自安祖卡路爾提早收咧後，球隊被迫倚重迪亞法沙高同安拿華倫西亞攻堅，效果唔算太差，而且中場高耶迪近期亦頻有「士哥」，雖然艾馬菲達奴繼續停賽，但對攻力影響唔算大，加上球隊近4仗主場未輸過，今仗有望重開勝門。
水晶宮「新帥效應」已過

水晶宮自新帥柏杜上任後，過咗一段蜜月期，但最近似乎有回落迹象，近3仗主場未贏過，佢哋現時有前鋒耶耶辛洛高、查馬克及中場謝路美湯馬士續缺陣，要爭取入球唔易。水晶宮最近4作客賽事雖然贏晒，但除英足盃贏修咸頓外，其他對手只屬同級分子，今造訪主場戰績唔錯嘅韋斯咸好難延續佳績，一於捧主Ｗ。

（now 621周六晚8時45分直播）