史特加搶分救火威番鋪

猪拉多纳

今晚揀咗場冇直播嘅漢諾威主場對史特加，史特加近期三連敗排緊包尾，今場作客面對位列中游而且一向主場強勁嘅漢諾威，只係受讓平半咁少，證明佢哋冇被輕視，黑柴亦深信史特加新帥史堤芬斯嘅功力，可以幫助球隊護級成功，推介史特加下盤。

（周六晚10時30分開賽）

現年61歲嘅史堤芬斯係德甲出名嘅救火教練，經常臨危受命都能交出好成績，尤其記得2007年2月，位列包尾嘅漢堡請佢救亡，佢花咗唔夠半季時間，帶領球隊喺最後15場聯賽取得9勝3和3負佳績，最終以第七名過終點，幾乎有得踢歐洲賽，認真唔簡單，佢出咗名係穩陣先生，史特加實力亦唔應該位列護級區，雖然近期三連敗，但對手分別係實力強橫嘅拜仁、賀芬咸同多蒙特，而且連仗都只係僅敗，表現絕對唔失禮，新加盟嘅科特迪瓦防守中場施利戴爾雖然年齡唔輕，但上仗對多蒙特顯示掃蕩力極強，對球隊幫助不少，而且史特加未來對手相對較弱，史堤芬斯絕對有力再一次救火成功。
漢諾威防線甩漏頂唔住

漢諾威季初係威係勢，但近期明顯回落，近六場聯賽不勝，最慘係呢六場對手除史浩克外全部都係弱旅，證明佢哋愈踢愈差，防線近期漏洞極多，中堅基斯甸舒侯斯今季明顯老退，速度反應大不如前，左閘米高艾保奴斯更多次成為球隊缺口，今場對住出名快嘅史特加右翼夏歷，同助攻力極強嘅右閘科利安基連，相信好難頂得住，史特加有望搶分而回。