索到堅料寸王狂操12碼

猪拉多纳

上周四晚Peter離港前，巧遇香港一代名將張子岱同張子慧，自60年代認識後，我哋一直私交甚篤，梗係一齊食晚飯兼敍舊啦！之後便急急去機場，帶領香港球迷參加英倫睇波團。去到英國倫敦後，先有當地殿堂級評述員馬田泰萊（Martin Tyler）擔任一個聚餐活動嘅嘉賓，並且撞到剛剛完成於車路士青年軍跟操兩周嘅香港U16新星林樂勤，而Peter喺聚餐周圍搵人吹水，當然亦索到好多聯賽盃決賽嘅猛料貢獻畀大家。

由於馬田泰萊啱啱去完車仔賽前記招，大爆車仔主帥莫連奴明言嚟緊對熱刺嘅英格蘭聯賽盃決賽乃係硬仗一場，係佢執教車仔以來最難打嘅決賽，「寸王」亦不忘補多句，對每個領隊同球員嚟講，下一場比賽永遠係最難打，忽然咁謙虛似係玩緊心理戰多啲喎。話雖如此，不過Peter覺得呢場決賽會比英格蘭足總盃更加激烈。
法定時間我貼1比1

點解咁講呢？一來車仔與熱刺均屬倫敦球會，喺倫敦溫布萊球場踢，直情係打吡戰中嘅打吡戰，仲唔打甩髀咩？預計雙方入場打氣嘅擁躉數目都係旗鼓相當，大戰氣氛必定熾熱。二來林樂勤曾經喺車仔訓練場練波嗰陣，親眼見到莫連奴指揮眾將狂練12碼，似乎「寸王」對於喺120分鐘擊敗熱刺都冇十足把握，要做定第二手準備，所以Peter認為呢場波好大機會打和，換言之即係熱刺下盤值得捧場，我又推介埋1比1波膽，到時若果要加時的話，邊隊攞冠軍就聽天由命啦喂！

（圖片：黃興桂提供）