羅馬祖記大有睇頭

猪拉多纳

意甲榜首激鬥

意甲今晚上演榜首戰大戰，羅馬喺主場對祖雲達斯，不妨試吓2.1倍入球大。羅馬現時落後祖記9分排第2，和都冇乜用，相信會不惜一切搶W，撞啱祖記有中場大腦派路因傷缺陣，隨時踢到亂晒龍同對手合演「大」龍鳳！

（TVB301台周二凌晨4:00直播）

現時羅馬有大批傷兵，除咗右閘馬爾干、後衞巴沙列堤同門將盧邦養傷外，中場史杜特文更加隨時提早收山，不過每當人去到絕境，就可能會發揮小宇宙，依家羅馬已經冇退路，主場死守都冇意思，不如放低包袱同祖記駁火好過。

祖記喺歐聯16強首回合主場以2:1領先多蒙特，形勢都幾好，不過中場派路喺比賽中受傷，今場唔使預佢，肯定會影響祖記喺控球能力，更何況佢哋已連續4場有失波，搞到連續4場開半場大同入球大，就算作客羅馬都唔似會用求和心態博1分算數。
意甲工業行動 抗議帕爾馬冇糧出

事實上，最近祖記射手泰維斯已經重新上力，對住AC米蘭同多蒙特都有波入，今季連盃賽上陣30場有20個入球，佢拍檔艾華路莫拉達都好犀利，對上6場個人有4個士哥，既然歐聯16強次回合未咁快開戰，相信祖記會用最強陣容同羅馬對攻，玩大佢啱數！由於意大利球員工會為抗議帕爾馬財政危機問題，尋晚發起工業行動，本周全部意甲賽事都延遲15分鐘開波，包括今晚羅馬對記呢場榜首大戰。