凱沙羅頓乘細偷雞

猪拉多纳

利華三線作戰搏殘

德國盃16強八場賽事分今明兩天上演，比賽一場過，90分鐘賽和將加時30分鐘，再和則互射12碼決出8強席位。今晚直播重點賽事係德甲「四哥」利華古遜迎戰德乙「三哥」凱沙羅頓，兩軍雖然有一個級別差距，但凱沙羅頓喺德國盃向來係利華剋星，考慮到利華三線作戰攰到暈，今仗隨時玩輪換，黑柴寧捧細盤。

（無綫翡翠台周三凌晨2時直播）

利華古遜近年喺德甲成績唔曳，但講德國盃成績就差過老牌勁旅凱沙羅頓好多。利華歷來只喺1993年捧過一次盃，計埋晒都係入過三次決賽咁大把，相反凱沙先後七次入決賽，仲喺90年同96年兩屆封王。「德國紅魔」依家雖然淪落德乙，近五次喺聯賽對利華古遜都輸，但上屆德國盃八強戰，利華主場同凱沙踢成0比0平手，加時利華輸埋0比1，睇番兩軍近三次喺德國盃碰頭，利華古遜都畀凱沙羅頓淘汰出局，都咪話唔邪。

利華較早前經歷過困難期，近期雖見好轉，但賽程太密，上周中歐聯苦戰擊退勁敵馬體會，跟住不足三日後聯賽亦幾經艱辛小勝弗賴堡，今晚又匆匆再戰，教練羅渣舒密特焗住要輪換；德國傳媒估計，主力攻擊手傑斯寧同孫興民都會輪休，加上德國國腳中場大將拿斯賓達上仗傷出要倦勤，人腳唔齊，面對歇冬後四戰三勝嘅凱沙好難予取予攜，隨時咬唔入主守嘅凱軍，捧細好過。
多蒙特谷起弗爆「登」

另一場直播德丙特雷斯登主場對德甲多蒙特就強弱懸殊，多蒙特聯賽四連勝強勢勒唔住，而且佢哋對德國盃向來認真，除三度奪冠外，上屆亦打入決賽，而且近年絕少被爆冷踢出局，過去三屆都只係輸畀拜仁；今晚作客遇弱大炒望濃，撐讓球客勝。

（TVB 13台周三凌晨3時30分直播）

聯賽四連勝令多蒙特由榜尾回升番上中游，尤其上仗魯爾區打吡大戰史浩克04，除大炒對手三球外，全場射門次數更係一面倒嘅31比3，球隊狀態終於歸晒位，面對史浩克都好似大人打細路咁，級數更低嘅特雷斯登根本冇得揮，何況主隊近況曳爆，歇冬後喺德丙五戰四敗，喺咁嘅情況下，就算多蒙特稍作輪換，前線出更飢渴嘅恩莫比尼都夠殺了。