全北玩緊迫敲魯能半場和

猪拉多纳

亞冠盃小組賽第二輪今日開打，中超盃出爐盟主山東魯能（足智彩譯FC山東）係E組主場迎戰韓職勁旅全北汽車，並無必勝把握，半場和有2.08倍咁好分，值得一博。

（now670台周二下午3:30直播）
魯能質高輸往績

魯能前個星期响中超盃互射12碼擊敗廣州恒大，攞到中超盃冠軍係威係勢，上星期亦喺E組首戰作客3:2擊敗越南平陽，走勢睇落唔曳，所以佢哋都雄心勃勃，專登製作咗一張「期待China F.C.Again」嘅海報，希望中超4支亞冠球隊繼上一輪之後，又再一齊贏波，呢個願望當然非常好，問題係呢一Round其實比較惡踢，尤其魯能今日對住全北，佢哋往績輸晒，2011年兩度對賽，魯能都係落敗一方，唯一畀到人信心嘅，係嗰兩場佢哋都半場守和。
全北李同國冇隨隊

當然，你可以話今時唔同往日，全北今季增兵動作好大，簽咗金南一、李浩、金亨鎰、趙星桓、辛炯民、李承基一大批有名氣嘅球員，但係大家細心睇吓，就知大部分新兵都成三張嘢，金南一直頭已經37歲添，從呢一點就睇得出全北嘅投資，遠遠比唔上中超球隊咁豪，咁肯使錢買入當打球員。而且王牌前鋒李同國、後衞趙星桓、澳洲兵韋堅遜都傷咗無法隨軍，全北形勢比較蝕底。

相比之下，魯能呢幾年投資咗唔少錢擴軍，今季雖然稍有收斂，人腳質素都仲係亞洲一流，只不過喺佢哋對平陽場波嘅數據睇到，魯能實力高對手成班，控球時間佔上風，不過傳中成功率得24.1%，顯然喺對方後衞緊迫之下，埋門好易斷纜，偏偏全北呢類韓職球隊至叻貼身攔截，教練崔康熙亦都洞悉咗魯能最強係邊線攻擊，實會對症下藥塞死條路，雙方前45分鐘開唔到紀錄一啲都唔出奇。