拜仁輪換照炒布倫瑞克

猪拉多纳

德國盃今晚續演四場第三圈賽事，重頭戲係德甲班霸拜仁慕尼黑主場迎戰德乙布倫瑞克，客軍向來係拜仁私房菜，現時又殘陣兼態沉，到訪安聯球場注定做炮灰，拜仁即仗收起部分主力都夠殺有餘，「讓球主客和」讓到兩球都冇問題，1.53倍讓球主勝可作過關重心。

（無綫翡翠台周四凌晨3時30分直播）

今場係德甲對德乙，不過兩軍實力同狀態差距根本唔只一班距離；拜仁聯賽四連勝共轟入二十球，既然喺德甲榜首已經有明顯優勢，對德國盃當然唔會放軟手腳，力爭三連霸。教練哥迪奧拿事先張揚會輪換，今屆未休過息嘅中場阿拉巴同門將紐亞，同埋狀態巔峰嘅洛賓都有可能輪休；西班牙門將連拿有望首度披甲，副選丹迪、比沙路同米素爾韋沙都會得到上陣機會，配合列貝利、羅拔利雲度夫斯基、湯馬士梅拿同馬里奧葛斯喺安聯球場攜手出擊，威力依然強橫。
乙組仔留力爭升班

布倫瑞克今屆由德甲降班德乙，去年底曾經一度五連勝位列聯賽榜次席，對重返德甲充滿憧憬；不過歇冬後全軍表現走晒樣，踢咗四場聯賽僅得一分，聯賽排名已跌至第六，最慘係上月中對波琴一役損兵折將，兩大主力射手夏華尼爾遜同古普基雙雙受重創，短期內復出無望。佢哋近六次對拜仁全敗，近五次更錄得零入球，今仗橫掂都唔夠砌，不如慳番啖氣留力聯賽打升班戰好過。