巴塞哨牙蘇大有作為

猪拉多纳

維拉利爾搶攻博反勝

西班牙盃決賽隊伍今晚揭盅，當中喺4強首回合輸1:3嘅維拉利爾，將會返主場再戰巴塞隆拿。教練馬些連奴鬥皇馬「讓Round」之後，今仗會派番韋圖同卓利舒夫呢對攻擊孖寶擔正搏命，對住有蘇亞雷斯（下圖）搵番對射門鞋嘅巴塞隆拿鋒線，1.5倍大真係要趁熱食。（now632台周四凌晨3:00直播）
聯賽收起8主力 潛艇搏今鋪

之所以話維拉利爾上場聯賽「讓Round」，皆因主帥馬些連奴足足收起咗8名主力，估唔到一樣逼到皇馬失分，如果唔係謝拉特摩蘭奴一下近射畀卡斯拿斯「神救」，「黃色潛艇」贏咗啦！賽後馬些連奴話，1:1賽和皇馬為全隊上下注入強心針，佢仲話今晚有機會扭轉劣勢踢巴塞出局，又話會派番首席射手韋圖同「助攻王」卓利舒夫擔正，肯定攻到巴塞甩轆都似。

連同歐霸盃同西盃在內，維拉利爾近10場主場賽事贏晒，又難怪馬些連奴咁大想頭嘅！不過巴塞最近都相當Fit，美斯、尼馬Keep住有貨交唔在講，最令Fans高興係蘇亞雷斯終於嚟料，近兩仗勁入3球。維拉利爾焗攻隨時益咗擅打反擊嘅「哨牙蘇」數胡，你話呢場波點會少波入吖！
西班牙盃賽制：

採主客兩回合制，今輪為4強次回合。兩回合計打和，計算作客入球優惠，未分勝負將於次回合法定時間後加時30分鐘，加時仍計作客入球優惠，再和則互射12碼決勝。