4大天王有路捉！

猪拉多纳

讓球王：神戶勝利船、甲府風林

神戶勝利船上季日職雖然排十一，但盤路成績極佳，以讓球盤計，佢哋上季六次讓波有五次順利開上盤，十七次受讓則贏咗十二次，贏盤率逾七成，不過要注意佢哋九次開出平手盤，成績僅為一勝三和五負，贏盤率急跌至一成，一旦出現平手盤宜忍手。如果鍾意玩平手盤嘅球迷要留意甲府風林，佢哋上季七次開出平手盤共取得五勝兩和未輸過，坐和望贏。
神戶勝利船

讓　球：6次 （5勝1負）

受　讓：17次 （12勝5負）

平手盤：9次 （1勝3和5負）

甲府風林

平手盤：7次 （5勝2和）

受　讓：22次 （13勝9負）

讓　球：4次 （1勝3負）
主場王：柏雷素爾

柏雷素爾上季十七場主場聯賽只輸一場，強如聯賽三甲分子大阪飛腳、浦和紅鑽及鹿島鹿角都係佢哋腳下敗將，表現極具說服力。另外大阪飛腳十七場主場聯賽亦勝出十一場，跟柏雷素爾並列主場勝率最高嘅球隊，但要留意兩者今季皆要兼顧亞冠盃，未知本土成績會否受影響。
大細王：清水心跳、甲府風林

以中位數2.5球計，上季日職開大次數最多頭四支球隊入面，清水心跳、大宮松鼠、神戶勝利船失球數字都超過五十球，防守曳自然有利開大。從另一角度分析，防守好嘅球隊可減少失球數字，攻力弱亦難製造入球，所以上季聯賽失球最少嘅橫濱水手，以及入球數字第二低嘅甲府風林自然成為追細盤最佳對象。
作客王：鹿島鹿角

鹿島鹿角上季於客場取得三十六分，比起主場多取十二分，當中十七場聯賽只曾三負，不敗率逾八成，為去季日職作客王。名古屋鯨魚聯賽總排名雖然只得第十，但作客成績卻僅次鹿島鹿角排第二，低調得來更多搵食機會。以積分計鳥棲砂岩作客成績雖然排第三，不過佢哋作客未試過和波，輸波率達四成，表現反而唔太穩定。