行運紅軍再傳捷布

猪拉多纳

冇「神奇隊長」反而仲掂

英格蘭足總盃8強今晚續有好戲，近況弗到爆嘅利物浦主場迎戰英冠仔布力般流浪，雖然「紅軍」隊長謝拉特今仗好大機會繼續缺陣，但今季冇「神奇隊長」在陣嘅比賽紅軍竟然取得全勝，都咪話唔諷刺，況且足總盃係佢哋今季唯一奪標希望，主場出擊又點會放過布力般，讓球主勝乃係不二之選。

（now 621及633周一凌晨零時直播）
史獨復出 戰績穩步上揚

謝拉特一向都係利物浦靈魂人物，無論係策應進攻，抑或鼓動隊友士氣，呢位「神奇隊長」影響力於隊中無人能及。不過，更鋒利嘅刀都有生銹嘅一日，謝拉特近期飽受傷患困擾，已經唔再係必然正選。睇番一啲數據，原來謝拉特今季缺陣嘅6場聯賽，利物浦竟然全部贏晒，證明「代隊長」佐敦軒達臣同拉爾拉拿等係有能力分擔謝拉特嘅工作。雖然「謝老四」嘅傷好得七七八八，但主帥羅渣士賽前表明唔會立即畀佢打番正選，既然班波run得咁順，佢老人家今仗將繼續休息。

踢波同做人一樣，總會有三衰六旺，當你畀黑氣纏身嗰陣點努力都冇符，相反行緊好運時，踢到幾差都贏到波，利物浦就係最佳例子。季初射手史杜列治受傷後，成班波好似撞邪咁，踢極都唔順，歐聯分組賽肉酸出局、英超一度跌落下游，似乎今季係咁先。好彩史杜列治傷愈復出後，利物浦慢慢重返正軌，聯賽接連擊敗修咸頓、曼城及般尼，隊波明顯行緊運，現時爬番上第5，信心返晒嚟。
近況飄忽 布力般難爆冷

利物浦上季臨尾香失落聯賽冠軍堅唔抵，球隊上下當然想有盃落袋，因此佢哋唔會於唯一捧盃希望足總盃Hea踢，睇番佢哋之前兩圈都喺落後之下反勝保頓同水晶宮，韌力十足。對手布力般始終得英冠級數，上圈淘汰英超分子史篤城全因打多個，早前試過4仗不勝，係上仗先贏番同屬中游嘅錫周三，表現咁鬼飄忽，今仗作客全面反彈嘅利物浦難逃大敗，斯維建議直取讓球主勝。