馬體會啃唔落強勢華倫

猪拉多纳

費托尼格度打翻身仗

兩大英超落難射手返祖國博翻身！今晚西甲上演前列大戰，由三哥馬德里體育會主場火併第四嘅華倫西亞，亦係雙方兩名於英超失意前鋒──「王子」費蘭度托利斯與「野獸」尼格度嘅大對決，華倫西亞挾住四連勝嘅氣勢，為搶前三直入來屆歐聯分組賽嘅入場券，絕對唔赦馬體會，「蝙蝠兵團」仲有得受讓半一，梗係撐下盤喇。

（now 632及TVB 13周一凌晨4時直播）

費蘭度托利斯一度喺英超入波好似食生菜咁易，可惜自2011年冬窗以5000萬鎊轉投車路士後，孭住天價加盟壓大太大慘變「廢托」，踢咗110場聯賽入得廿粒，肉酸到暈，上半季借畀AC米蘭又冇料到，難得母會馬體會讓佢「愛回家」，梗係飯應喇。雖然呢位西班牙箭頭歸隊後變番「王子」，接連喺盃賽對皇馬同巴塞有士哥，但與弗爆正選前鋒基沙文相比，狀態差幾條街，今仗費托大有機會藉住基沙文停賽獲得上陣，實在靠唔住。
馬體會唔齊腳蝕章

另一邊廂，尼格度上季効力曼城曾威過一輪，之後因傷失落正選，連為西班牙出征世盃機會都冇埋，佢老哥又思鄉情切，「藍月亮」索性將佢借畀華倫西亞，呢隻「野獸」誓要做番齣好戲，儘管佢入波唔多，勝在衝得撞得又速度唔曳，經常為隊友做開路先鋒，比一撞即散嘅費托好用得多。睇番「蝙蝠兵團」原來只差三哥馬體會1分，如果殺入前三就唔使踢附加賽，直接取得來屆歐聯分組賽資格，今場「6分波」唔搏等幾時呀？況且馬體會除咗基沙文之外，中堅祖奧米蘭達亦要坐波監及中場沙奧尼古斯養傷，陣容不整之下，點讓得起連贏4場嘅華倫西亞半一？下盤有2.08倍咪嫌少。