買老波骨實力「大」增 岡山怕岐阜有牙?!

猪拉多纳

（日）8 岡山綠雉 Vs FC岐阜

怕你有牙?!日乙今日開鑼，岡山綠雉今季換咗監督，仲簽埋加地亮、岩政大樹呢啲過氣日本國腳，陣容更見完整，主場對住剛啱拉隊整過牙嘅FC岐阜，唔單只有權開W，整個2.2倍入球大出嚟真係唔奇。

日乙加入咗降班制度之後，比以前健康咗，但係呢個次級聯賽有樣嘢大家要注意，就係有心升班嘅球隊，一定要投資搞好基建，攞到個J1參賽證，到時贏埋名次至有得升，否則就會好似上季北九州向日葵咁，打入升班附加賽都因為只得J2參賽證，連附加賽都唔踢得，根本得個玩字，好易累人追錯球隊。
岐阜拉隊睇牙

岡山呢支上季第8嘅中型班，依家夠條件攞到J1證，新季亦搞咗大堆宣傳計劃，希望催谷平均觀眾每場過萬，希望升得上日職，佢哋响休季期間簽咗加地亮、岩改大樹呢啲前日本國腳，又由大分、愛媛買入一啲日乙老波骨，綜合戰力提高咗，公認係前列分子嘅材料。

由巴西裔入籍前日本國腳瑠偉揸旗嘅岐阜換血換得仲勁，總共加咗11件新兵，當中4件仲係身高1米8至1米9嘅後衞，包括大分件前國腳高木和道，銳意強化防守。呢班波其實目標都係升班，佢哋樣樣都比較規範，好似早兩日就拉隊去睇牙，驗吓呢班球員有冇蛀牙、牙周病，事關牙唔好可能影響呼吸，仲順便度身做埋牙膠，等班球員落場去盡啲，有乜碰撞都唔使咬親條脷。

由於呢兩班波仲處於新舊融合過程，尤其中後場變動比較大，而且過往岡山主場8戰岐阜開咗5個入球大，就算開細嗰3場都只得一次兩無紀錄，入球大冷係冷咗啲，但係都有博嘅價值。