跌晒Watt歎慢板 皇馬-2聽當克

猪拉多纳

等咗咁耐，今晚終於上演歐聯16強次回合，首回合淨勝兩球嘅皇家馬德里，家陣喺歐聯已經累積10連勝，今場只要擊敗史浩克04，就打破拜仁兩年前創下嘅歐聯最長連勝紀錄。弊在隊波近期狀態曳之餘，揸住兩粒作客入球又隨時歎慢板，今場莫講話大炒，隨時連贏都贏唔到，邊度讓得起兩球先？一於撐受讓嘅史浩克2.3倍「讓球客勝」。

（有線61、64、201及203、中央5台周三凌晨3:45直播）

皇馬近況都幾曳，喺西甲接連失分，先係主場被維拉利爾逼和，上場作客畢爾包又倒灶輸波，兩場聯賽慘跌5分不特止，仲將榜首位置拱手讓畀死敵巴塞隆拿。就算今場波會由「福星」史高米拿執法，呢位斯洛文尼亞球證喺分組賽吹過皇馬，嗰場「艦隊」大勝巴素利5:1，不過皇馬咁沉，球證幫得幾多吖。
西甲接連失分 C朗射門命中率低

「銀河艦隊」主帥安察洛堤講到明，隊波目前最大問題係進攻唔係防守，並批評前線過多單打獨鬥，欠缺季初行雲流水嘅整體組織。其實皇馬喺莫迪歷同占士洛迪古斯受傷後，創造力明顯減低唔少，最弊係王牌C朗最近跌晒Watt，近8場有半數錄得射門零中龍，今場靠佢搵食真係信唔過。
史浩克贏波反彈 終止4場不勝

其實作客嘅史浩克近期狀態都唔算好，但佢哋上輪德甲主場擊敗賀芬咸，成功結束連續4場不勝走勢，相信球員信心都提升唔少。雖然張峰唔睇好史浩克能夠反勝皇馬晉級，不過做球員好多時喺無壓力下都會踢出超水準，今場撞正經歷緊低潮嘅「銀河艦隊」，相信史浩克班球員都想趁機踢爭氣波，受讓兩球抵捧啦！
Data King：史浩克歐聯旺角球細

‧皇馬近7場有5場開出「角球細」。

‧史浩克歇冬後3場作客全開「半場和」。

‧史浩克今屆7場歐聯開出6次「角球細」。
乜都玩錦囊：皇馬唔急追半場細

皇馬揸住兩個作客入球喺手，今場根本唔使急。史浩克就礙於實力所限，想急都急唔嚟，加上C朗近期腳風唔順，今場不妨再追1.75倍「半場細」。
盤路解碼

連同歐聯及西甲在內，皇馬連續5場開出「半場細」。
歐聯賽制

採主客兩回合制，今輪為16強次回合。兩回合計打和，計算作客入球優惠，未分勝負將於次回合法定時間後加時30分鐘，加時階段仍計作客入球優惠，再和則互射12碼決勝。