流浪者回穩圖破殘城

猪拉多纳

今日有場澳職獨腳戲，西悉尼流浪者主場對墨爾本城。流浪者雖然喺澳職只係贏過1場，仲要兼顧埋亞冠盃，但球隊近3仗落敗都只係輸1球，表現其實已有進步，今仗主場出擊面對傷兵滿營搞到「啞火」嘅墨爾本城，相信可以取得第2場聯賽勝仗，平手盤捧西悉尼流浪者。

（周三下午4時30分開賽）
墨爾本城傷兵多死晒火

墨爾本城上仗作客不敵中岸水手，令球隊爭入前6踢季後賽嘅機會大受打擊。事實上，墨軍現時備受傷兵問題困擾，中場加魯斯奧、杜夫、積及美爾寧同後衞維拿特皆因傷缺陣，另一中場杜簡錫亦有傷上陣成疑，令球隊近7仗有5場「食白果」嚴重影響成績，加上球隊今季作客只係贏過兩場，今趟面對志切贏波嘅流浪者相信都係冇運行。

上屆亞冠盃盟主西悉尼流浪者，今季要再度兼顧澳職同亞冠盃兩條戰線，加上球隊有唔少傷兵，搞到現時喺澳職只係贏得1場咁大把。不過，流浪者近3場波都係僅以1球之差落敗，可見球隊表現已逐漸上力，況且上仗休戰嘅門將高域可以候命上陣，相信有望提升球隊防線嘅穩健性，加上有埋地利之助，平手盤捧得過。