全攻拖連奴同辛尼特駁火

猪拉多纳

今晚意甲球隊五路興師，其中拖連奴作客挑戰俄超一哥辛尼特，客軍人腳實力輸蝕，遠征聖彼德斯堡唔樂觀，但佢哋踢法開放，就算作客都唔會縮，大盤有2倍值博。

（有線64及203台周五凌晨1時直播）
主隊孖寶弗到爆燈

辛尼特貴為俄超一哥，而且喺聯賽榜拋離次席莫斯科中央陸軍7分，可更專注歐霸盃，佢哋上圈兩回合合計4比0淘汰荷甲勁旅燕豪芬，歇冬後兩線作戰三戰全勝，雙箭頭荷西朗頓同侯克三場波加埋包辦七個入波弗到爆燈，主場出擊更添信心。

拖連奴喺意甲排第九，爭標冇佢份，護級亦唔使憂，可以落足心機踢歐霸，球隊近期主客都搶攻，近三場歐霸盃先後作客炒哥本哈根5比1、主場和畢爾包2比2、同作客贏畢爾包3比2，踢法有前冇後，上輪聯賽作客烏甸尼斯力拚下輸2比3，今場相信以攻代守同辛尼特死過。