仙台維加泰素雷慰亡靈

猪拉多纳

日職周五獨腳戲柏雷素爾主場對仙台維加泰，今年係日本311大地震4周年，仙台當年係重災區，大軍喺3月11日拉大隊去「慰靈之塔」悼念死難者，呢次梗係會為佢哋而戰啦！翻查往績，佢哋對上3年喺311後第一場聯賽例牌唔輸，呢次受讓半一，蘇豪撐下盤！

（有線61及201台周五晚6時直播）

日本311大地震4周年當日，仙台維加泰拉大隊到訪位處仙台市若林區荒賓嘅「慰靈之塔」，全軍28個球員到齊。呢次係教頭渡邊晉第一次領軍去到荒賓地區，佢話見到呢個地方搞成咁，好想幫助當地復興，所以希望球會壯大起嚟。事實上，仙台巴打每逢悼念完311大地震後都特別落力作戰，對上3年喺311後首場聯賽錄得2勝1和，硬淨喎！
柏雷素爾往績輸蝕

仙台維加泰肯定好肉緊，但淨係有心冇用，都要班兵有料嘅，隊中主力射手威爾遜洛迪古斯第一周聯賽梅開二度，協助球隊搞掂山形山神，弗喎！今場雖有中場野澤拓也坐波監，但班兵咁好士氣，唔怕嘅！柏雷素爾喺亞冠盃同聯賽兩連勝，型仔射手工藤壯人狀態唔錯，不過呢班波近季對住仙台冇乜着數，對上5次主場對仙台錄得1勝2和2負，靠唔住啦！