巴斯蒂亞換帥掂受讓筍

猪拉多纳

今晚法甲直播有摩納哥主場鬥巴斯蒂亞。巴斯蒂亞自從季中換帥後已成法甲一路奇兵，聯賽不敗率逾七成。排第四嘅摩納哥問鼎聯賽錦標機會不大，歐聯十六強次回合已殺到埋身，摩納哥未必會搏盡，捧讓球客勝。

（TVB 302周六凌晨3時30分直播）
法聯盃贏過摩納哥

巴斯蒂亞季初搵咗前法國國腳馬基列尼執教，不過只係踢咗短短三分一比賽，高層已經發覺唔對路，結果上年十一月決定壯士斷臂，搵咗現任教頭比連特接手，事實證明冇錯，比連特上任後除咗頭三場聯賽輸波，之後十一輪聯賽取得六勝四和一負，不敗率超過七成，而且佢哋曾經贏過聖日耳門、里爾等勁旅，法聯盃亦喺四強淘汰今場對手摩納哥殺入決賽，演出充滿說服力。

摩納哥下周中喺歐聯十六強次回合主場迎戰阿仙奴，佢哋首回合領先三比一，殺入八強機會高唱入雲，為留力球員難免有顧慮。而且剛才提過佢哋上個月喺法聯盃四強曾鬥巴斯蒂亞，結果踢足一百二十分鐘都贏唔到對手，最後仲要射輸十二碼，所以就算搏盡亦未必有甜頭，一於捧有得受讓嘅巴斯蒂亞。