韋碧克Hit爆廠 扑錘開騷

猪拉多纳

「雲格想開心，為甚麼需要等，買下酋長的福音，我韋碧克降臨，全取得3分，會每周都發生，你有萬億的資金，我有黑碧戰神！」依首由黎天王金曲《眼睛想旅行》譜上新詞嘅靚歌，最近唱到街知巷聞，皆因韋碧克喺上場足總盃倒戈曼聯射入奠勝球，幫阿仙奴殺入4強。今晚返到酋長球場對住跌Watt嘅韋斯咸，一於捧1.91倍嘅「讓球主勝」！
阿仙奴張伯倫打柴

阿仙奴今季主場威力強勁，近10場主場拎到9勝1負佳績，夾埋入咗24球，只失咗6球，又攻得又守得，絕對稱得上係「主場王」！最重要係前線球員輪流着火，阿歷斯山齊士之後有基奧特，依家又有「黑碧戰神」On Fire博表現，加埋奧斯爾同辛迪卡索拉校炮，鋒力唔講得笑。

雖然阿歷士張伯倫上場勇戰受傷又要抖，不過阿仙奴中場其實夠晒人用，法國小將高基連自從1月上位後，一直穩佔正選席位，佢嘅攔截、解圍次數喺英超名列前茅，係「兵工廠」突然彈起嘅無名英雄。另一新星右閘比利連日前亦剛啱同阿仙奴續新約，成隊波士氣旺盛。
錘仔安拿華倫西亞 湯堅斯齊受傷

作客嘅韋斯咸近排個勢好鬼沉，近7戰未贏過，當中有4場仲要係破唔到蛋！最弊係佢哋鋒線傷兵多，安祖卡路爾同卡頓高爾仲養緊傷，點知安拿華倫西亞賽前又騎呢受傷，據聞佢唔小心打爛咗隻裝住熱水嘅杯，自己踩咗落碎片度令腳趾受傷要做手術，今晚將會缺陣。中堅湯堅斯尋日練波仲因為膊頭甩骹送院，極可能提早收咧，佢哋咁黑仔受讓都無着數啦！
乜都玩錦囊：交手5連大再追

阿仙奴最近火力強勁，除咗有射手韋碧克打破入球荒，另一法國前鋒基奧特亦好生猛，連續3場聯賽都有士哥。對手韋斯咸雖然近5次鬥兵工廠都輸波收場，但唔係齋捱打冇還手，每次交鋒都有波入。既然雙方連續5次交手都開大盤，咁好路梗係要追埋1.52倍大喇。
Data King：錘仔英超作客6連雙

‧阿仙奴近9次鬥韋斯咸全勝。

‧韋斯咸近6場英超作客開晒「入球雙」。

‧雙方近6次對決，其中5場開出「半場大」。
盤路解碼

阿仙奴連續6場英超主場開出「半贏全贏」。