皇馬-3辣得滯 利雲特讓客有計

猪拉多纳

西甲班霸皇馬近期頹到爆，連續3場波未贏過之餘，仲將坐咗5個月嘅西甲榜首席位讓埋畀死敵巴塞，班Fans唔擔心就假。「銀河艦隊」今晚會喺主場恭候利雲特，雙方實力有一段差距，皇馬要攞晒3分應該唔成問題，不過要大炒一場借勢振軍心似乎未係時候，讓到「-3」絕對係多得滯，今晚一於撐韌力唔錯嘅利雲特2.2倍「讓客」。

（now632台周一凌晨4:00直播）

皇馬近期頭頭碰着黑，雖然上半季喺西甲順風順水，力壓死敵巴塞做「1哥」，可惜歇冬後始終未返到最巔峰狀態，喺聯賽接連失分畀維拉利爾同畢爾包，將榜首席位讓埋畀巴塞。上周中歐聯16強次回合仲驚險，衰到喺主場3:4輸畀史浩克04，幾乎踩蕉皮被踢出局，就連門將卡斯拿斯都承認成班波正陷低潮，搞到主帥安察洛堤都聞到魷魚香，內部立立亂要迅速反彈唔係易事。
巴利近9戰食白果

「銀河艦隊」下個星期就要喺西甲硬撼巴塞，今晚當然想做番齣好戲，喺「國家打吡」前重振聲威。今場對住利雲特，皇馬無可否認係技高唔止一籌，奈何佢哋信心、狀態都好難令人投以信任一票，事關加里夫巴利已經連續9場食白果，就算莫迪歷傷愈復出亦狀態未足，想大勝4球難度極高。

相反對家利雲特近況唔曳，近1個月贏過伊巴、CF格蘭納達同馬拉加，雖然2月中喺作客吞過巴塞5蛋，但佢哋對住維拉利爾、西維爾同馬體會呢啲實力分子，輸波都係一球起兩球止，韌力唔錯都未豆腐得晒，今戰造訪陷信心危機嘅皇馬，就算攞唔到分都應該唔會輸得好難睇，受讓3球一於博「讓客」。