蒙迪拿帶費倫攞A

猪拉多纳

有料少帥搶恩沙基飯碗？

今晚意甲費倫天拿主場對AC米蘭，非常受矚目，事關近期盛傳AC計劃邀請費倫主帥蒙迪拿執教，佢今仗變相「見工」，當然要顯領軍功架，加上有大勇嘅「埃及美斯」穆罕默德沙拿幫手，贏面相當大。反觀AC教練恩沙基民心盡失，兼且遇上球隊傷停問題，恐怕難逃一敗，可以準備定執包袱，力捧主勝。

（TVB 301周二凌晨2時直播）

兩位40歲出頭嘅少帥蒙迪拿同恩沙基都係意國著名射手，球員時代享負盛名，但講到教波「飛機仔」蒙迪拿明顯勝一籌。費倫現時屬於爭前3位分子，並且已打入歐霸盃16強。球隊一度保持13仗不敗，直至上輪聯賽輸畀拉素先至斷纜，不過球隊整體狀態仍然當勇，小小挫折對球隊影響唔大，尤其係冬季獲得「埃及美斯」穆罕默德沙拿加盟，令攻力大增，呢位車仔棄將加盟後4場聯賽入咗3球，加上擅於個人突破，可為隊友製造機會，要撕開AC防線並唔難。
AC米蘭殘陣勢頹

AC米蘭近11場聯賽贏得兩場，經常傳出會方準備炒恩沙基，就算唔使中途下台，相信球季後亦冇得留低，依家可以話處於「捱」嘅境況。加上不時爆出賣盤消息，球隊前途未明，士氣低迷。AC傷停問題嚴重，中場安德列普利坐波監，尼祖迪莊、後衞迪施基利奧、阿爾拉米、沙柏達華倫西亞、阿歷士洛里高都有傷在身，抵擋唔住費倫強攻。
羅馬唔識贏點讓波

另一場意甲羅馬主場對森多利亞，羅馬踏入2015年後變成「和波專家」，近9場聯賽有8場打和。如果計埋盃賽近10次主場出擊都贏唔到，今仗仲要讓波，當然揀森多利亞讓球客勝。

（TVB 301周二凌晨4時直播）