全北汽車 猛火炒魚腩

猪拉多纳

亞冠盃今明上演第三輪分組賽，E組直播南韓全北汽車主場撲擊越南平陽。平陽頭兩輪分組賽全敗已成此組魚腩，力爭出線嘅全北汽車主場出擊絕冇失分空間，就算全北汽車讓到三球，照捧讓球主勝。

（now 670周二晚6時直播）

全北汽車喺今屆亞冠盃表現慢熱，首輪主場出擊只能悶和日職柏雷素爾，好彩次輪作客FC山東踢出漂亮一仗大勝四比一，其中曾効力德甲史浩克04嘅巴西新前鋒干卡維斯喺亞洲水準嚟講可以算係超晒班，而且陣中仲有兩名巴西兵李安納度洛迪古斯及伊連奴，三人同聲同氣分外有默契，發揮更加如魚得水，今仗更有主場之利，喺球迷打氣之下必定踢得更落力，實行大炒對手一壯士氣。
越南平陽上仗大敗未夠班

平陽頭兩輪分組賽俱落敗，首戰對FC山東有主場之助尚且有一戰之力；次輪作客柏雷素爾即見晒底，全場被圍攻最終大敗一比五，實力似乎未夠班於亞冠分組賽立足，今場作客更不容樂觀。由於全北汽車現時和柏雷素爾同分，FC山東則以一分落後排第三，如無意外三隊將會角逐兩個出線席位，全北汽車面對實力最弱嘅平陽一旦有咩閃失，隨時影響日後出線機會，預料主隊唔敢放軟手腳，只要發揮水準，大勝一仗相信冇難度，波童捧讓球主勝。